Sylfaenydd a Chadeirydd

Elin Rhys

Yn dilyn gradd mewn biocemeg ym mhrifysgol Abertawe fe wnaeth Elin ymchwil ar ddatblygiad addysg wyddonol drwy gyfrwng y Gymraeg. Ym 1979 cychwynodd ar yrfa fel gwyddonydd yn Awdurdod Dwr Cymru yn archwilio ansawdd dwr yfed a dwr gwastraff. Ym 1984 dechreuodd ei gyrfa yn y cyfryngau yn cyflwyno a chynhyrchu rhaglenni, gwyddonol yn bennaf, i nifer o sianelau megis S4C, BBC Schools a Channel 4. Bu hefyd yn cyflwyno rhaglenni cyffredinol ar nifer o bynciau i S4C, BBC Wales, HTV Wales a BBC 2 gan gynnwys dogfennau, rhaglenni cylchgrawn a digwyddiadau byw. Sefydlodd gwmni Telesgop ar Fai y 4ydd 1993 gan gyflogi, ar gyfartaledd, 30 aelod o staff parhaol. O fewn ei swyddogaeth fel rheolwr mae Elin wedi bwrw golwg dros gannoedd o oriau o deledu a radio; rhaglenni dogfen ar BBC Wales, BBC FOUR, S4C, Channel 4 a Discovery; rhaglenni cylchgrawn i BBC Wales ac S4C, rhaglenni byw o ddigwyddiadau i BBC, a chyfres bwysig Ffermio. Enillodd y cwmni ambell wobr BAFTA Cymru dros y blynyddoedd. Mae gan Telesgop aden radio, gan gynhyrchu 700 o oriau yn flynyddol, ac adrannau addysg a chorfforaethol. O ran cynhyrchu rhaglenni ei hun, maes gwyddoniaeth yw prif ddiddordeb Elin, yn cynnwys cylchgrawn wyddonol Dibendraw, a rhaglenni pwysig ar oblygiadau newid hinsawdd i S4C a Sky Vision - Her yr Hinsawdd. Erbyn hyn mae hi'n canolbwyntio ar radio gyda chyfresi gwyddonol megis Yfory Newydd, Y Cwestiwn Mawr, What If, The Moon and Us, I Need my Space. Yn fwy na dim, mae Elin yn falch iawn ei bod wedi sefydlu cwmni hollol annibynol yng ngorllewin Cymru a chynnig cyfle i gymaint o dalent cynhyrchu y gorllewin sydd yn medru byw ac aros yng nghefn gwlad Cymru.

Rheolwr Gyfarwyddwr

Dyfrig Davies

Dechreuodd Dyfrig weithio i Telesgop yn llaw-rydd dros 27 mlynedd yn ôl, cyn dod yn aelod o staff a datblygu bellach i fod yn Rheolwr Gyfarwyddwr. Mae ganddo brofiad eang o gyfarwyddo, cynhyrchu ac uwch gynhyrchu ar ddigwyddiadau byw a rhaglenni dogfen. Mae’n uwch gynhyrchydd ar raglenni Telesgop o Sioe Frenhinol Cymru (dros bedwar diwrnod) bob blwyddyn ar gyfer BBC Four a BBC Wales. Ers dros ddeng mlynedd mae wedi bod yng ngofal darlledu dau o brif ddigwyddiadau byw S4C (sy tua 18 awr y flwyddyn) – o’r Ŵyl Cerdd dant a Steddfod y Ffermwyr Ifanc. Gyda’r ddau gynhyrchiad mae Telesgop yn cydweithio mewn partneriaeth gyda chwmni arall a chwmni adnoddau.

Bu’n cynhyrchu am dair blynedd, ddigwyddiad byw a darleddu byw o gwmas sioe deithiol hanesyddol – y Porthmyn, y Goets Fawr a dilyn llwybr y Sipswn Romani. Golygai hyn symud y safle cynhyrchu a darlledu bob dydd o le i le, a darlledwyd y rhaglenni byw ar draws yr wythnos. Mae hefyd wedi cynhyrchu rhaglenni byw ac uchafbwyntiau dros y deuddeg mlynedd diwethaf ar Dreialon Cŵn Defaid Rhyngwladol, gan weithio i S4C a BBC Alba, Roedd yn uwch gynhyrchydd ar Bencampwriaethau Para-olympaidd Ewrop a gynhaliwyd yn Abertawe ar gyfer S4C.

Mae’n brofiadol gyda chynhyrchu dogfennau ar gymeraidau a digwyddiadau hanesyddol ac mewn delio gyda digwyddiadau byw ac uchafbwyntiau (radio a theledu), mae hefyd yn uwch gynhyrchydd ar raglen wythnosol llwyddiannus Telesgop i S4C ar fyd amaeth, sef ‘Ffermio’. Mae e hefyd wedi cyfarwyddo, cynhyrchu a bod yn uwch gynhyrchydd ar nifer o raglenni sydd wedi cael enwebiad ac ennill BAFTA a rhaglenni a fu ar restr fer gwobr John Grierson am raglenni dogfen.

Cyfarwyddwr Cwmni, Cynhyrchydd Radio a Golygydd

Ffion Rees

Mae Ffion wedi cynhyrchu rhaglenni radio i BBC Radio 2, BBC Radio Cymru a BBC Radio Wales. Mae’r rhaglenni yma’n cynnwys ‘Sir Tom’s Musical Years’, cyfweliad arbennig rhwng Sir Tom Jones a Cerys Matthews i ddathlu ei benblwydd yn 80 i BBC Radio 2 a BBC Radio Wales. ‘First Cast – Cats’ lle cafodd cast a thîm cynhyrchu gwreiddiol y sioe West End aduniad a rhannu straeon gyda Ben Thompson. Rhaglen yn rhannu clecs ac atgofion yn cynnwys Lord Andrew Lloyd Webber, Sir Cameron Mackintosh, Brian Blessed, Elaine Paige, Bonnie Langford a mwy!

Yn ogystal a golygu ei rhaglenni radio mae Ffion wedi bod yn olygudd llun gyda Telesgop ers 2014, yn gweithio ar y gyfres wythnosol Ffermio a chyfresi Her yr Hinsawdd a Climate Challenge i S4C a Sky Vision. Mae Ffion wedi golygu eitemau a rhaglenni cyflawn o amryw ddigwyddiadau ar gyfer S4C, BBC Wales a BBC Four, ac mae wedi gweithio ar sawl prosiect addysg a chorfforaethol

Yn Rhagfyr 2020 fe raddiodd Ffion o gwrs '10,000 Small Businesses Programme' gan Goldman Sachs & Ysgol Fusnes Saïd, Prifysgol Rhydychen.

Cyfarwyddwr Cwmni, Cyflwynydd

Richard Rees

Bu Richard yn gyfarwyddwr yn Telesgop bron ers y dechrau ac yn gyfrifol am ennill cytundebau dirifedi a chynhyrchu cannoedd o oriau i’r cwmni. Cyn hynny bu gyda’r BBC am 20 mlynedd. Richard oedd yn gyfrifol am ennill cytundeb Ffermio i’r cwmni, ac hefyd y darllediadau o Faes y Sioe Frenhinol sydd wedi bod yn gymaint o hanes y cwmni ers y dechrau. Ei brif ddiddordeb personol yw byd natur ac yn ddiweddar fe gwbwlhaodd ffilm dros 5 mlynedd ar fywyd gwyllt yr afon mae’n byw yn ei hymyl, yr Afon Tywi. Dros y blynyddoedd mae wedi ffilmio nifer o gyfresi bywyd gwyllt i S4C o bedwar ban byd, gan gynnwys y ddau begwn.

Drwy gydol ei yrfa bu Richard yn darlledu ar y radio, gan fod yn un o’r troellwyr cyntaf ar Radio Cymru. Mae Richard yn dal i ddarlledu yn fyw bob bore Sadwrn ar BBC Radio Cymru.

Cyllid / Materion Busnes

Keith Evans

Mae gan Keith hanes hir ym maes y cyfryngau fel un sydd yn delio gyda materion ariannol. Dros y blynyddoedd fe wnaeth feithrin perthynas gyda nifer o ddarlledwyr ac yn ei yrfa flaenorol gyda HTV Cymru bu'n gyfrifol am gadw trefn ar gyllidebau enfawr. Mae ganddo gyfrifoldeb dros ochor fusnes ac arianol y cwmni ym mhob un o adrannau y cwmni.

Pennaeth Gweinyddol

Siân Ann Davies

Gyda 10 mlynedd o brofiad fel Cynorthwydd Cynhyrchu yn y BBC, symudodd Siân ymlaen at Telesgop fel PA, gweinyddydd ac ymuno gyda’r adran gyfrifon. Mae ei phrofiad, ymrwymiad a theyrngarwch dros y 27 mlynedd diwetha’ wedi chwarae rôl bwysig i lwyddiant parhaol Telesgop.

Cynorthwydd Cynhyrchu

Sarah Hendre

Ymunodd Sarah â Telesgop yn y flwyddyn 2000 i weithio ar rhaglenni’r Sioe Frenhinol fel Cynorthwydd Cynhyrchu. Cyn hynny, cafodd ei hyfforddi yn adran newyddion y BBC yng Nghaerdydd.

Mae wedi gweithio ar holl rhaglenni byw Telesgop ac yn amhrisiadwy wrth greu amserlenni ar gyfer rhaglenni digwyddiadau’r cwmni fel The Royal Welsh Show.

Sarah sydd â’r dasg o glirio cerddoriaeth rhaglenni Telesgop megis ‘Music for Misfits – The Story of Indie’, ‘John Denver: Country Boy’ and ‘Meat Loaf: In and Out of Hell’ ac Eisteddfod y Ffermwyr Ifanc ac mae’n deall y system hawlfraint drwyddi draw.

Rheolwr Cynhyrchu

Elin Mair

Ers dechrau gyda Telesgop yn 2010, mae Elin Mair wedi ymgymryd â sawl rôl o fewn y cwmni, ond ers rhai blynyddoedd bellach, mae’n Rheolwr Cynhyrchu ar gynyrchiadau Telesgop. Mae hyn wedi cynnwys trefnu ffilmio o fewn y Deyrnas Unedig, yn ogystal â threfnu teithiau tramor gan gynnwys yr Unol Daleithiau, Uganda, Norwy a Seland Newydd. Mae wedi bod yn Rheolwr Cynhyrchu ar raglenni dogfennol fel Jazzology a David Hurn: A Life in Pictures ar gyfer BBC Four, Lily: A Transgender Story ar gyfer BBC One Wales a BBC Three, Climate Challenge ar gyfer Sky Vision, a Her yr Hinsawdd, Y Bomiwr a’r Tywysog a’r gyfres wythnosol Ffermio ar gyfer S4C.

Mae hefyd wedi gweithio droeon ar ddigwyddiadau fel The Royal Welsh Show ar gyfer BBC One Wales a BBC Four, ac Eisteddfod CFFI Cymru a’r Ŵyl Cerdd Dant. Yn ogystal â gweithio ar raglenni teledu a radio, mae hefyd wedi rheoli amryw o brosiectau addysg ar gyfer Llywodraeth Cymru, er enghraifft gwe-blatfformau am y diweddar Dylan Thomas, T. Llew Jones ac Yr Athro Gwyn Thomas.

Cynhyrchydd Radio

Terwyn Davies

Ymunodd Terwyn â chwmni Telesgop yn 2011, ar ôl cwblhau cwrs ôl-radd mewn Newyddiaduraeth o Brifysgol Cymru Bangor, a bu’n gweithio ar nifer fawr o raglenni gan gynnwys Ffermio, Sioe Fach a Dathlu’r Sioe – cyfres o raglenni ar ganmlwyddiant Cymdeithas Amaethyddol Frenhinol Cymru. Bu’n cyflwyno eitemau ar y Bwletin Ffermio a Ffermio ar S4C, cyn mynd yn ei flaen i gynhyrchu pedair cyfres o Bro ar gyfer S4C, gan deithio Cymru benbaladr gyda Iolo Williams a Shân Cothi, yn cyfarfod â chymeriadau o bob math.

Mae Terwyn hefyd yn lais cyfarwydd ar BBC Radio Cymru, gan gyflwyno rhaglenni ieuenctid yr orsaf, C2, am flynyddoedd. Yn ddiweddar, mae Terwyn wedi bod yn cynhyrchu rhai o raglenni radio gan Telesgop i’r orsaf gan gynnwys rhaglen Tommo, Swyn y Sul gyda Lloyd Macey, Swyn y Sul gydag Arwel a Myrddin Hogia’r Wyddfa, ac erbyn hyn mae’n cynhyrchu rhaglen Ifan Evans bob prynhawn o ddydd Llun i ddydd Iau.

Terwyn yw cyflwynydd rhaglen materion gwledig a chefn gwlad Radio Cymru, Troi’r Tir, sy’n darlledu bob dydd Sul am 7am.

Cynhyrchydd

Gwawr Lewis

Ymunodd Gwawr â Telesgop nol yn 2007 fel ymchwilydd dan hyfforddiant ac wedi dal swyddi is-gynhyrchydd, cyfarwyddwr ac erbyn nawr yn gynhyrchydd cyfres Ffermio, yr unig raglen amaethyddol wythnosol yn y Deyrnas Unedig. Dros y ddwy flynedd diwethaf, mae wedi bod yn gyfrifol am ddwy raglen awr arbennig o Ffermio, Gareth Wyn Jones yn Seland Newydd a rhaglen fyw o wyna ar fferm un o’r cyflwynwyr.

Dros y blynyddoedd mae wedi gweithio ar amryw o gynyrchiadau, wedi cynhyrchu The Royal Welsh Show, Treialon Cwn Defaid Rhyngwladol, Sioe Sir Fôn, Sioe Sir Benfro, Hwyl Steddfod y Ffermwyr Ifanc, Cofio Brynle Williams yn ogystal â ‘Pencampwriaeth Athletau Ewropeaidd yr IPC’. Mae Gwawr yn gynhyrchydd golygu profiadol ar y cynyrchiadau uchod a hefyd ar gyfresi ‘Y Goets Fawr’ a ‘Y Sipsiwn’. Ar hyn o bryd, mae’n cynhyrchu rhaglen arbennig o ‘Our Lives’ i’r BBC.

Newyddiadurwr a Chyfarwyddwr Darlledu

Ellen Llewellyn

Newyddiadurwr a chyfarwyddwr profiadol sydd yn allweddol i dim Ffermio. Merch i ffarmwr, gyda dros 20 mlynedd o brofiad ym myd darlledu.

Cyn ymuno â Telesgop, bu Ellen yn gweithio fel gohebydd ar raglenni cylchgrawn dyddiol S4C 'Wedi 7' a 'Wedi 3'. Mae hi hefyd wedi gweithio fel newyddiadurwr radio. Mae gan Ellen ddawn i fynd at galon stori yn gyflym trwy sgiliau ymchwil o'r radd flaenaf.

Tu allan i'r gwaith mae hi'n cyfrannu at lwyddiant ysgubol y fuches bedigri Hirgron ar fferm y teulu. Hefyd, mae Ellen yn rhedwraig frwd sydd wedi cystadlu yn Marathon Llundai, ac yn hyfforddi ar gyfer Efrog Newydd!

Is Gynhyrchydd

Rhys Jones

Wedi cwblhau ei ddoethuriaeth ym Mhrifysgol Aberystwyth, ymunodd Rhys â chwmni Telesgop ym mis Mai 2016, fel ymchwilydd ar y rhaglen ‘Ffermio’. Ar hyn o bryd mae’n gweithio fel is-gynhyrchydd ar y rhaglen ‘Ffermio’ ac wedi cynhyrchu'r rhaglen am gyfnodau ynghyd a rhaglenni arbennig y gyfres.

Hefyd bu’n rhan o’r tîm sy’n gyfrifol am ddarlledu nifer o raglenni byw y mae cwmni Telesgop wedi eu cynhyrchu fel yTreialon Cwn Defaid Rhyngwladol, Eisteddfod CFfI Cymru â'r Gŵyl Cerdd Dant.

Ymchwilydd

Elen Davies

Wedi cwblhau gradd yn y Gymraeg a Newyddiaduraeth ym Mhrifysgol Caerdydd, ymunodd Elen â chwmni Telesgop ym mis Ionawr 2020 fel ymchwilydd ar y rhaglen ‘Ffermio’. Fel merch ffarm, mae Elen yn angerddol am faterion amaethyddol ac yn mwynhau gallu cyfuno ei chariad tuag at gefn gwlad gyda’i gwaith bob dydd!

Yn ogystal â’i rôl gyda thîm ‘Ffermio’, erbyn hyn, mae hefyd yn un o gyflwynwyr y Bwletin Amaeth boreol ar BBC Radio Cymru, lle mae’n ymchwilio ac adrodd newyddion diweddaraf y byd amaeth.

Cyfarwyddwr / Camera

Gareth Vaughan Jones

Mae Gareth wedi gwethio gyda Telesgop ers 1996 ar ôl bod gyda’r BBC a chyfnod yn gweithio’n llawrhydd. Yn ystod ei gyfnod o 36 mlynedd yn y diwydiant mae e wedi gweithio ar ystod eang o gynhyrchiadau dros y cyfnod hyn gan gynnwys rhaglenni, dogfen, ffeithiol, chwaraeon, drama a materion cyfoes. Cynhyrchodd Gareth gyfres bysgota, ‘Sgota gyda Julian Lewis Jones a enwebwyd ddwywaith ar gyfer BAFTA[Cymru]. Hefyd cafodd y gyfres ei henwebu ar gyfer yr Wyl Ffilm Geltaidd yn Stornoway. Cynhyrchodd Gareth raglen ar y Clipper Round the World Race Hwylio’r Byd[S4C] gydag Elin Haf Davies a rhaglen Nigel Owens at the Royal Welsh Show[BBC],hefyd roedd yn Gyfarwyddwr ar rhaglen Gareth Wyn Jones yn Seland Newydd[S4C]. Bu hefyd yn gweithio fel gwr camera ar Davinci’s Demons – tu ôl i’r llenni [Starz & Fox].

Ar hyn o bryd mae Gareth yn gweithio fel Cyfarwyddwr/ Gŵr Camera a Gweithredwr SUV [drôn] ar y rhaglen Ffermio ar S4C.

Ymchwilydd Radio

Dai Williams

Mae Dai yn ymchwilydd Radio sy’n gweithio’n bennaf ar Raglen Ifan i BBC Radio Cymru - Llun i Iau 2-5yp. Yn ogystal ag ymchwilio mae Dai hefyd yn cynhyrchu’r rhaglen pan fydd y prif gynhyrchydd i ffwrdd.

Gallwch glwywed llais Dai yn aml yn ystod rhaglen Ifan yn ogystal a’i gyfraniadau i raglenni arall ar draws y sianel.

Ymchwilydd Radio a Gohebydd

Rhodri Davies

Ymunodd Rhodri â Telesgop yn 2021 fel ymchwilydd i raglen Troi’r Tir ar BBC Radio Cymru; rhaglen wythnosol sy’n cynnwys newyddion a sgyrsiau sy’n ymwneud â ffermio a chefn gwlad. Mae e hefyd yn ohebydd i’r Bwletin Amaeth ar BBC Radio Cymru. Fe fagwyd Rhodri yn Aberystwyth lle ddatblygodd ei fwynhad o ddarlledu wedi cyfnod fel gwirfoddolwr a chyflwynydd ar orsaf radio Ysbyty Bronglais. Parhaodd gyda’i ddiddordeb ym myd y cyfryngau gan ddilyn cwrs mewn Cymraeg a Newyddiaduraeth ym Mhrifysgol Caerdydd. Mae e hefyd yn ganwr brwd ac yn aelod ffyddlon o gôr Aelwyd y Waun Ddyfal.

Researcher / Development

Srishti Berry

Ymchwilydd Archif / Hunan-saethwr / Sain

Will Samuel

Yn dilyn graddio yn y cyfryngau yn Aberystwyth fe ynunodd gyda Telegop yn 2014 gan weithio ar nifer o raglenni. Fe wnaeth greu a chynhyrchu cyfres i bland Fferm Fach. Mae'n gweithio fel peirianydd sain hefyd ac ymchwiliydd archif ar rai o'r cynhyrchiadau mwyaf cymhleth fel Prince and The Bomber, ffilm Marc Evans a The Story of Indie,y ddwy raglen yn ennill BAFTA.

Mae hefyd yn saethu fidios cerddorol ac yn cyflwyno podcast.

Nid oes terfyn ar ddawn Will!

Golygydd / Peiriannydd

Dai Rees

Mae Dai yn uwch olygydd ac yn gofalu am elfennau perianneg darlledu, naill a'i yn y stiwdios neu ar ddarllediadau allanol.

Mae ganddo flynyddoedd maith o brofiad golygu ac yn barod i droi ei law at bob math o wahanol arddull.

Mae yn gerddor yn ei amser sbar gan ganu Saxophone mewn bandiau.

Cydlynydd Ôl-gynhyrchu / Golygydd

Teleri Rees

Mae Teleri yn gyfrifol am yr adran ôl-gynhyrchu. Mae wedi gweithio ar y mwyafrif o gynyrchiadau Telesgop ers 2014, sy’n cynnwys y gyfres ‘Music For Misfits’ â enillodd BAFTA Cymru yn 2016. Mae hefyd yn golygu eitemau Ffermio.

Post Production

Leia Cordey

Having recently graduated from the University of South Wales with a masters in film editing, Leia has joined our post production team here at Telesgop.

Cynllunydd We

Tom Mann

Yn wreiddiol o Ogledd Cymru, fe ymunodd Tom gyda Telesgop ym Mehefin 2022 fel cynllunydd we. Fe astudiodd Tom gerddoriaeth yn Athrofa Cerddoriaeth Fodern Prydain ac Iwerddon cyn dechre' hyfforddiant mewn Datblygu Full Stack gyda Northcoders. Mae Tom yn ddatblygydd brwd gyda diddordeb mawr mewn gwaith datblygu blaen hefyd.

Cynhyrchydd

Aled Richards

Ymunodd Aled â chwmni Telesgop yn 2022. Mae ganddo dros 20 mlynedd o brofiad o ddatblygu adnoddau addysgol, rhyngweithiol i ysgolion. Yn ystod ei yrfa mae wedi awduro a chynhyrchu CD-ROMau, gwefannau ac apiau ar gyfer disgyblion o 3 - 16 mlwydd oed.

Mae Aled yn mwynhau gweithio gyda gwahanol gyfryngau. Mae'n awdur llyfrau plant ac wedi sgriptio sioeau theatr, rhaglenni radio â theledu.

Aled sydd â chyfrifoldeb am brosiectau addysg Telesgop.